Եթե կողմերի մեջ չկա վստահություն, բանակցային գործընթացում առաջընթաց չի լինի. Շավարշ Քոչարյան
Շատ կարևոր էր հանդիպումն ու ակնհայտ է, որ մեր ազգային նպատակների իրականացման ճանապարհն անցնում է Արցախով:
Այս մասին «Արցախպրես»-ի թղթակցի հետ զրույցում ասել է Հայաստանի Հանրապետության արտգործնախարարի տեղակալ Շավարշ Քոչարյանը՝ նշելով, որ այս տեսակետից ամեն մի քննարկում շատ կարևոր է և ոգևորող:
Նա ասել է, որ ԱՀ նախագահ Բակո Սահակյանի հետ հանդիպման ժամանակ քննարկել են տարբեր թեմաների շուրջ:
Խոսելով բանակցային գործընթացի մասին՝ Շ. Քոչարյանը նշել է. «Մենք պետք է տարբերակենք երկու հարթություն, որով գնում են բանակցությունները. այն նաև առաքելությունն է երեք համանախագահների համար: Առաջինն այն է, որ կողմերը կարողանան գալ ընդհանուր հայտարարի, որը տարիների ընթացքում չի իրականանում, որովհետև Ադրբեջանը հարցադրումը դրել է այսպես՝ կամ ամեն ինչ կամ ոչինչ: Արդյունքը ոչինչ է: Երկրորդ հարթությունում, եթե հաշվի առնենք, որ երեք համանախագահող երկրները ՄԱԿ-ի անվտանգության խորհրդի մշտական անդամներ են, չպետք է թույլ տան, որ ռազմական գործողություններ սկսվեն: Այդ երկու հարթակները սերտ կապված են իրար: Անհնարին է բանակցային գործընթացում առաջընթաց, քանի դեռ կողմերի միջև չկա վստահություն: Իսկ որպեսզի լինի փոխվստահություն, անհրաժեշտ է, որ չկրակեն, չսադրեն, ռազմական հռետորաբանությանը վերջ տրվի: Ես չեմ կարող ասել հերթական հանդիպումն ինչ օրակարգով է լինելու, բայց կողմերի միջև վստահությունն անհրաժեշտ է: Երեք պետությունները Մինսկի խմբի համանախագահ երկրներ են և պատահական չէ Արցախի նախագահի այդ երեք երկրներ այցելելը, ինչի համար էլ Բաքուն միշտ բողոքում է»:
Նշենք, որ Արցախի Հանրապետության Նախագահ Բակո Սահակյանը նոյեմբերի 30-ին ընդունել է Հայաստանի Հանրապետության արտգործնախարարի տեղակալ Շավարշ Քոչարյանին: