Պետք է արվի այն ամենը, ինչը Նիկոլ Փաշինյանը խոստացավ, բայց չարեց
Հեղափոխական էյֆորիան անցավ, այդ փուլը համարենք վերջացած: Եկել է լուրջ խոսակցության ժամանակը:
Թե իշխող կուսակցության, և թե իրենց ընդդիմադիր համարողների համար դժվար ժամանակներ են սկսվում, նախընտրական քարոզչության ընթացքում պետք է լուծումներ առաջարկեն: "Ժողովրդի իշխանություն", "սև-սպիտակ", "մասնակցում ենք, որ լինենք ընդդիմություն" և նմանատիպ անբովանդակ ու պարզունակ արտահայտությունները կորցրել են իրենց իմաստը:
Բոլոր մասնակիցները պետք է պոտենցիալ ընտրողներին համոզեն, որ տնից դուրս գան ու գնան ընտրատեղամասեր: Դժվար գործ է լինելու:
Մասնավորապես, ինձ ընտրատեղամաս ներկայանալ կարող է համոզել այն ուժը, որը մեկ տարվա ընթացքում կանի ամեն ինչ, որ արտահերթ ԱԺ ընտրություններ կկազմակերպեն: Դրա մեթոդը արդեն գիտենք, իսկ եթե բոլորը դա ասեն, արդեն կարող ենք համարել, որ պետական մտածողությունն են սկսել ձեռք բերել:
Իսկ մինչ այդ պետք է մի շարք փոփոխություններ մտցնեն Ընտրական օրենսգրքում, Կուսակցությունների մասին օրենքում (նաև բոլոր կուսակցությունների վերագրանցում, ըստ այդ օրենքի պահանջների), սահմանադրության մեջ (Ոստիկանության և ԱԱԾ-ի նախարարություններ դարձնել, նախագահի լիազորությունների լայնացում, նախարարների ու դեսպանների պարտադիր հաստատում պառլամենտի կողմից, դատական համակարգի անկախության մեխանիզմների ստեղծում և այլն):
Սա է եկող խորհրդարանի (ժամանակավոր խորհրդարանի, կամ անունը դնենք "Կարճ Խարհրդարան") գլխավոր կոչումը: Այդ ամենը պետք է արվի լայն հանրային քննարկումների միջոցով, որտեղ նոր պատգամավորները պետք է ներկայանան առանց կոստյումների, փողկապների և կուսակցական նշանների:
Այսինքն պետք է արվի այն ամենը, ինչը Նիկոլ Փաշինյանը խոստացավ, բայց չարեց: Մինչև ընտրությունները մենք պետք է այս հարցերի շուրջը գանք համաձայնության: Սա պետք է լինի Ժամանակավոր Ազգային Համաձայնության խորհրդարան:
Ստեփան Դանիելյանի ֆեյսբուքյան էջից