«Հայաստանն՝ առանց վարչապետի». միջազգային մամուլի անդրադարձը Նիկոլ Փաշինյանի հրաժարականին (տեսանյութ)
Նիկոլ Փաշինյանը երեկ հայտարարեց իր հրաժարականի մասին: «Ես այսօր հրաժարական եմ տալիս ՀՀ վարչապետի պաշտոնից: Դրա նպատակը, սակայն, ձեր առաջ ստանձնած պատասխանատվությունից խուսափելը չէ, այլ, ընդհակառակը, մեր թավշյա հեղափոխությունն ավարտին հասցնելն, արտահերթ խորհրդարանական ընտրություններին հասնելը»,- հայտարարեց Փաշինյանը:
Հրաժարականին անդրադարձել են միջազգային մի շարք հեղինակավոր լրատվամիջոցներ՝ նշելով, որ Նիկոլ Փաշինյանն ինքնակամ հրաժարական ներկայացրեց՝ դեկտեմբերին արտահերթ խորհրդարանական ընտրություններ անցկացնելու նպատակով:
«Հեռացավ՝ վերադառնալու նպատակով: Նիկոլ Փաշինյանը հայտարարեց իր հրաժարականի մասին: Ինչո՞ւ քաղաքական գործիչը, ով վայելում է Հայաստանի բնակչության միաձայն աջակցությունը, ինքնակամ լքեց պաշտոնը»,- հարց է ուղղում Новая газета-ն:
Պարբերականը նշում է, որ «հեղափոխությունից հետո Նիկոլ Փաշինյանը նոր նախարարների նշանակեց, սակայն խորհրդարանի մեծամասնությունը մինչ այժմ նրա գաղափարական հակառակորդներն են՝ Հանրապետական կուսակցությունը»: «Տարօրինակ է, որ նրանք կողմ քվեարկեցին մայիսին, սակայն դժգոհ մնացին: Միևնույն ժամանակ, Փաշինյանը, ազատվելով նախկին վարչապետ Սերժ Սարգսյանից, հնարավորություններ էր փնտրում՝ ազատվելու մյուս հանրապետականներից»,- գրում է Новая газета-ն:
Նիկոլ Փաշինյանի հրաժարականի և ԱԺ-ի լուծարման մասին հայտնում են նաև Независимая газета, ТАСС, РБК, Регнум և մի շարք այլ ռուսական լրատվամիջոցներ:
Ռուսական մամուլը նշում է, որ դրանից հետո ՀՀ նախագահ Արմեն Սարգսյանն անմիջապես ընդունել է կառավարության հրաժարականը:
«ՀՀ Սահմանադրության համաձայն՝ վարչապետի և կառավարության հրաժարականից հետո յոթնօրյա ժամկետում Ազգային ժողովի խմբակցություններն իրավունք ունեն առաջադրելու վարչապետի թեկնածուներ: Եթե խորհրդարանը չընտրի վարչապետ, ապա կրկին յոթնօրյա ժամկետում նոր ընտրություններ կանցկացվեն: Վարչապետ չընտրելու դեպքում երկրորդ անգամ խորհրդարանը կլուծարվի օրենքի ուժով», - հայտնում է Интерфакс-ը:
«Նիկոլ Փաշինյանը հրաժարական տվեց՝ արտահերթ ընտրություններ անցկացնելու նպատակով: Փաշինյանն, ով բարձր ժողովրդականություն է վայելում, կմնա վարչապետի պաշտոնակատար, քանի դեռ խորհրդարանը նոր վարչապետ չի ընտրել»,- գրում է Reuters-ը: Գործակալությունը հիշեցնում է, որ «Իմ Քայլը» դաշինքը, որի մեջ է մտնում Փաշինյանի «Քաղաքացիական պայմանագիր» կուսակցությունը, անցած ամիս Երևանի ավագանու ընտրություններում հավաքեց ձայների 81%-ը:
Փաշինյանի հրաժարականի և դեկտեմբերին նախատեսված արտահերթ խորհրդարանական ընտրությունների մասին հայտնում են նաև Aljazeera, Gulf Times, AFP, India 123, The Daily Star և մի շարք այլ լրատվամիջոցներ:
Արաբական Al Jazeera հեռուստաալիքը, որը մշտապես հաղորդում է հայաստանյան իրադարձությունների մասին, տեսանյութ է ներկայացրել: