Սուրեն Պապիկյանը հանդիպել է Կամո Արեյանի եւ «Սանիթեք» ընկերության գործադիր տնօրենի հետ
ՀՀ տարածքային կառավարման եւ զարգացման նախարար Սուրեն Պապիկյանն այսօր հանդիպել է Երեւանի քաղաքապետի պաշտոնակատար Կամո Արեյանի եւ «Սանիտեք» ընկերության գործադիր տնօրեն Նիկոլաս Էլ Թավիլի հետ, այս մասին տեղեկանում ենք Պապիկյանի ֆեյսբուքյան էջի գրառումից:
«Վերջին շրջանում աղբահանության հետ կապված խնդիրները քննարկելու նպատակով այսօր հանդիպում ունեցա «Սանիթեք» ընկերության գործադիր տնօրեն Նիկոլաս Էլ Թավիլի եւ Երեւանի քաղաքապետի պաշտոնակատար Կամո Արեյանի հետ։
Զրույցի ընթացքում իմ մտահոգությունները հայտնեցի քաղաքի սանիտարահիգիենիկ անմխիթար վիճակի եւ աղբահանության ոչ պատշաճ իրականացման կապակցությամբ։
«Սանիթեքի» գործադիր տնօրենը իրավիճակը պարզաբանեց մեկ տասնյակ աղբատար մեքենաների միաժամանակյա խափանմամբ՝ հավաստիացնելով, որ արդեն իսկ Հայաստան են ներմուծվել անհրաժեշտ թվով մեքենաներ եւ երկուշաբթի օրվանից կշահագործվեն ինչպես վերանորոգված, այնպես էլ՝ նոր աղբատարեր։
Իր հերթին Երեւանի քաղաքապետի պաշտոնակատարը հավաստիացրեց, որ լրացուցիչ տեխնիկական միջոցներով կշարունակեն աջակցել «Սանիթեք» ընկերությանը մինչեւ կվերականգնվի քաղաքի մաքրման աշխատանքների բնականոն ընթացքը։
Լիահույս եմ, որ «Սանիթեք» ընկերությունը կշարունակի պատշաճ կերպով իրականացնել Երեւանի սանիտարամաքրման եւ աղբահանության աշխատանքները պայմանագրով ստանձնած իր պարտականությունների շրջանակներում։
Լրացուցիչ պարզաբանում-հայտարարությամբ հանդես կգա նաեւ «Սանիթեք» ընկերությունը»,- գրել է Սուրեն Պապիկյանը։