«Թուրքիան և Ադրբեջանը միասնական ռազմաքաղաքական միավոր են Արցախի հարցում»․ Երվանդ Բոզոյան (Տեսանյութ)
Հունիսի 29-ին Հանրային դիվանագիտության կենտրոնը Մեդիա կենտրոնի աջակցությամբ կազմակերպել է «Ղարաբաղյան խնդիրը նոր քաղաքական պայմաններում. Թուրքիայի գործոնը» խորագրով քննարկում:
Քննարկման շրջանակներում փորձագետները անդրադարձել են քաղաքական փոփոխությունների ազդեցությանը ղարաբաղյան հակամարտության կարգավորման գործընթացում, նոր մոտեցումներին հայ-թուրքական հարաբերություններում, Թուրքիայում կայացած ընտրությունների արդյունքներին և Հայաստանի արտաքին քաղաքականության օրակարգի հետ կապված բազում այլ հարցերին:
Բանախոսներն են՝
Վարուժան Գեղամյան, թուրքագետ
Ստեփան Գրիգորյան, քաղաքագետ, Գլոբալիզացիայի և տարածաշրջանային համագործակցության վերլուծական կենտրոնի նախագահ
Երվանդ Բոզոյան, քաղաքագետ, «Դիալոգ» հայկական փորձագիտական կենտրոնի նախագահ։
Արցախի հարցում Ադրբեջանի վարած քաղաքականությանը հայկական կողմից պետք է տրվի համարժեք արձագանք, իսկ պաշտոնական Երևանը և՛ միջնորդների, և՛ հայ հասարակության համար պետք է ճշգրտի՝ ինչպես է Լեռնային Ղարաբաղը մասնակցելու բանակցային գործընթացին։
Այս մասին այսօր քննարկման ժամանակ ասաց քաղաքագետ Երվանդ Բոզոյանը։
«Ես կողմնակից եմ, որ Լեռնային Ղարաբաղը մասնակցի։ Սակայն, մենք պետք է հաշվարկենք այդ դիրքորոշումն ինչ արդյունք կարող է տալ, իսկ, միգուցե, այդ արդյունքը կարող է այլ ձևո՞վ լինել։ Սրա հետևանքները, միգուցե, լինեն այն ձևի, որը մենք չէինք սպասում, պետք է ամբողջական հասկանանք՝ ինչ կոնցեպտով ենք շարժվում»,- ասաց քաղաքագետը՝ հավելելով, որ Հայաստանը պետք է այս հարցում տարբերակի՝ որոնք են Ադրբեջանի և Թուրքիայի շահերը, քանի որ Թուրքիան և Ադրբեջանը միասնական ռազմաքաղաքական միավոր են Արցախի հարցում։
Մանրամասները՝ Factor.am- i տեսանյութում։