Սեյրան Օհանյանը, Սեյրան Սարոյանը և Սասուն Միքայելյանը մեկնաբանում են Մանվել Գրիգորյանի հայտնի գործը (Տեսանյութ)
Մանվել Գրիգորյանին ճանաչել ենք որպես մարտական, ծառայողական ընկեր, որն Արցախյան ազատամարտի ժամանակ բավական լուրջ ներդրում և արժանիքներ է ունեցել, «Ազատություն» ռադիոկայանի հետ զրույցում անդրադառնալով ԱԺ պատգամավոր, գեներալ-մայոր Մանվել Գրիգորյանի հետ կապված ԱԱԾ բացահայտումներին՝ ասաց պաշտպանության նախկին նախարար Սեյրան Օհանյանը։
«Բայց տվյալ երևույթն ինչպես ամբողջ ժողովրդի համար, այնպես էլ մեր համար, նաև իմ համար շատ մեծ ցավ է։ Տպավորություններն, իհարկե, վատն են։ Կարծում եմ, որ հաշվի առնելով անմեղության կանխավարկածը՝ պետք է սպասել, թե իրավապահ մարմինները ինչ կասեն, որովհետև, բավականին լուրջ ընթացակարգեր պետք է անցնեն ամբողջությամբ պարզելու իրողությունները», - ասաց Սեյրան Օհանյանը։
Նա նշեց՝ ես ցավ եմ ապրում, որովհետև, ի վերջո, այդ ամեն ինչը տարվել է մեր զինվորից։
«Հատկապես աշակերտների նամակների առկայությունը, որոնք իրենց սիրտն էին բացել մեր զինվորների առջև՝ տրամադրելու, որ իրենք պայքարեն, այնպես, ինչպես իրենք արել են Ապրիլյան պատերազմի ժամանակ։ Իհարկե, երևույթը տհաճ է։ Բայց պետք է պարզաբանումներ լինեն, որովհետև մատակարարման խնդիրները մի քանի հարթության վրա են իրականացվում», - նշեց նախկին նախարարը։
Մանրամասները՝ տեսանյութում։
Սասուն Միքայելյանի համար անակնկալ էր այն, ինչ հրապարակվել էր ԱԱԾ տեսանյութում: Միքայելյանը նշեց, թե կապ չունի կատարողները ովքեր են, բոլորն էլ պետք է պատասխան տան:
Դիտարկմանը՝ Ձեզ համար անակնկալ էր, որ տուշոնկաներով արջեր են կերակրում, նա ասաց. «Իհարկե անակնկալ էր. արջը կերավ արջին»:
Մանրամասները՝ տեսանյութում։
«Ոնց կարայի ես իմանայի, որ էտի տենց բանա անում, որ իմանայի, բա խայտառակ չէի անի։ Ոնց ա հիմա իմ երեսին նայելու, ոնց, ինձ հետ հիմա ինչ ձևի ա շփվելու։ Ես իմ հորից էլ կհրաժարվեի, եթե տենց բան աներ։ Մի մարդ, ոնց կարող ա իջնել այդ աստիճանի, չգիտեմ․․․Մանվելն ինչ չուներ, Մանվելը մնացել էր տուշոնկին, շուկա, հացի գործարան, խի ես պետությունը մեզ թողել էր սոված,ո՞նց կարելի էր հերոսից իջնել «տուշոնկա» գողցողի»,-ԱԺ միջանցքներում լրագրողներ ին է ասել մտերիմ ընկերոջ արարքից խիստ զայրացած գեներալ Սեյրան Սարոյանը։
Սեյրան Սարոյանը նշեց, որ հիասթափված է իր ընկերոջից, ով բազմաթից անգամներ իր ներկայությամբ երդումներ է տվել, որ զինվորի հացը չեն գողանալու․ «Աշխարհում ամենավատ բանը, երբ հարազատ մարդու ես կորցնում, դրանցի վատ բան չկա»,-ասաց պատգամավորը։
Մանրամասները՝ տեսանյութում։
Zham.am