Ինչո՞ւ դատախազը հետ չի վերցրել կալանավորման միջնորդությունները, եթե գտել է, որ հիմնավոր չեն
Քննչական կոմիտեն գտնում է, որ առնվազն տարակուսանք է առաջացնում դատախազության տարածած հայտարարությունը, թե Քննչական կոմիտեն շտապողականություն է դրսևորել Էրեբունի վարչական շրջանում ապրիլի 22-ին տեղի ունեցած զանգվածային անկարգությունների գործով և նախաքննության ընթացքում թույլ են տրվել բացթողումներ, ինչի կապակցությամբ դատախազությունը ՔԿ նախագահի ուշադրությունն է հրավիրվել:
«Փաստինֆո»-ի խնդրանքով՝ տարածված հայտարարության վերաբերյալ Քննչական կոմիտեի նախագահի խորհրդական Սոնա Տռուզյանը հայտնեց, որ նախաքննական մարմինը գտել է, որ ունի բավարար ապացույցներ և մեղադրանքներ է առաջադրել Մասիսի քաղաքապետին՝ անկարգությունները կազմակերպելու և դրանց մասնակցելու, իսկ մյուսներին՝ միայն դրանց մասնակցելու համար և միջնորդություններ ներկայացվել դատարան՝ նրանց նկատմամբ որպես խափանման միջոց կալանավորումը կիրառելու վերաբերյալ։
Նախաքննական մարմինն իր որոշման մասին պատշաճ ընթացակարգով տեղեկացրել է դատախազին: Նույն օրը՝ հունիսի 1-ին, դատախազի պահանջով քրեական գործը ուղարկվել է դատախազություն, եթե դատախազությունը կարծում էր, որ նախաքննական մարմինը ցուցաբերել է շտապողականություն, ապա կարող էր օգտվել ՀՀ քրեական դատավարության օրենսգրքի 283-րդ հոդվածով նախատեսված իր իրավունքից և հետ վերցնել միջնորդությունները դատարանից, ինչը չի արվել։
Սոնա Տռուզյանի խոսքով՝ նման նախադեպեր այլ քրեական գործերով արձանագրվել են: Դատարանի որոշումից օրեր անց, երբ մերժվում է նաև փոխքաղաքապետի նկատմամբ որպես խափանման միջոց կալանավորումն ընտրելու մասին դատախազի միջնորդությունը, այդօրինակ հայտարարության տարածումը մեղմ ասած անհասկանալի է։
ՔԿ նախագահի խորհրդականը գտնում է, որ եթե իսկապես դատախազությունը կարծում է, որ ՔԿ-ն ցուցաբերել է շտապողականություն, ապա կարծում է նաև պետք է հիմնավորի, թե ինչու՞ դրանք հետ չեն վերցվել և արդյոք դատախազները ենթարկվե՞լ են պատասխանատվության՝ ոչ պատշաճ դատախազական հսկողություն իրականացնելու համար:
Կոմիտեից նաև հայտնեցին, որ հունիսի 1-ից մինչ այսօր քրեական գործը հետ չի ստացվել և դատախազությունում է:
Աղբյուր` Փաստինֆո