Ինչո՞վ է զբաղված ԱԱԾ-ն
Նիկոլ Փաշինյանի գլխավորած կառավարությունից հանրային սպասելիքները մեծ են: Նրանից սպասում են քաղաքական, տնտեսական, սոցիալական ու այլ բնույթի խնդիրների լուծում:
Պարզ է, որ մեկ օրում այդ խնդիրները Նիկոլի կառավարությունը չի կարող լուծել, բայց դե պետք է կոնկրետ մսեիջներ ստանալ, թե ինչ են պատրաստվում անել և ինչ ուղղությամբ են գնում: Իսկ ուղղությունն այդ, հաշվի առնելով մի շարք երևույթներ, Ազգային անվտանգության ծառայությանը և դրա պետին քաղաքական ու տնտեսական գործոն դարձնելն է, ինչն այնքան էլ լավ բան չէ:
Հասկանալի է, որ նախկինում եղել է պետականորեն համակարգված թալան: Հասկանալի է, որ նախկինում լֆիկները վերևների հետ պայմանավորված են աշխատել և անհրաժեշտ է ջարդել այդ համակարգը, բայց դա չի նշանակում, որ ԱԱԾ-ին պետք է դարձնել հարկային մարմին և բիզնես դաշտի ակտիվ մասնակից:
ԱԱԾ-ի հիմնական ֆունկցիան հետախուզությունն ու հակահետախուզությունը պետք է լինի: Մինչդեռ մենք տեսնում ենք, որ ԱԱԾ-ն դարձել է ներքաղաքական գործիք: Եթե նախկինում այդ գործիքն օգտագործվում էր քաղաքական դաշտի դեմ (Սերժ Սարգսյանի համար անցանկալի քաղաքական գործիչների ու ակտիվ հանրային դեմքերի ապօրինի գաղտնալսումներ, հետապնդումներ և այլն), ապա այժմ ԱԱԾ-ն սկսել է բիզնեսի դեմ գործել և կրկին գործիքի դեր կատարել՝ կոնյունկտուրայից ելնելով:
Եթե ԱԱԾ-ն շարունակի ՊԵԿ-ի դերակատարում ստանձնել, ապա կդառնա մոնստր կառույց և ի վերջո կվերածվի կոռուպցիոն կենտրոնի: Հատկապես, որ ԱԱԾ պետի մերձավոր շրջապատը բիզնեսից հեռու մարդ չէ: Այսօր ԱԱԾ-ն հարկայինի ֆունկցիա է կատարում վարչապետի հրահանգով, վաղը կարող է սեփական նախաձեռնությամբ խաղեր տալ, ինչի արդյունքում թացը չորի հետ կարող է վառվել ու մեծ վնաս հասցնել նոր կառավարության իմիջին:
Այնպես որ ԱԱԾ-ն պետք է իր բուն առաքելությունն իրականացնի, իսկ բիզնես դաշտում պետք է գործի հարկայինը: Ու եթե խնդիր է դրված տնտեսական հարաբերությունները փոխելու, ապա դա հռեկոպալի չի կարելի անել, այլ պետք է օրենսդրական դաշտը վերանայել, հաստատել նոր խաղի կանոններ և սահմանել շուկայական մեխանիզմներ:
ԱԱԾ-ին չպետք է թույլ տալ, որ ժամանակի ընթացքում գլխներիս նոր Սաշիկ դառնա, իսկ որ դրա հոտը գալիս է, ակնհայտ է:
Դավիթ Մարտոյանի ֆեյսբուքյան էջից