Ներելի չէ, որ հայի արյուն հոսի հայրենի սրբազան հողի վրա. Արամ Ա կաթողիկոս
Արամ Ա Կաթողիկոսը մի քանի ժամով ժամանում է Հայաստան: Բեյրութի օդանավակայանում Հայաստան մեկնելուց առաջ Կաթողիկոսը պատասխանել է Cilicia TV-ի՝ Հայաստանում ստեղծված իրավիճակի վերաբերյալ հարցերին:
Արամ Ա-ն նշել է, որ անտարբեր չենք կարող մնալ Երևանի փողոցներում տեղի ունեցող երևույթների նկատմամբ: Հայաստանին ինքնություն ու իմաստ տվող, հզորությունն ու հավերժությունը երաշխավորողը ժողովուրդն է:
Կաթողիկոսի խոսքով, անհրաժեշտության պարագայում ժողովրդի իրավունքն է քաղաքակիրթ մոտեցումով իր դժգոհությունն ու սպասումն արտահայտելու:
Նա նշել է, որ վերջին օրերին Երևանի ցույցերը ընդվզումի արտահայտություն են, սակայն ինչ էլ լինի բողոքի դրդապատճառը, ներելի չէ, որ հայի արյուն հոսի հայրենի սրբազան հողի վրա: Ներելի չէ, որ ոստիկանների ու երիտասարդների միջև բախումներ տեղի ունենան, երբեմն ոստիկանությանը ձերբակալությունների մղելով:
Նա նշել է, որ խնդիրները պետք է քննվեն և լուծման ուղիներ որոնվեն միասնաբար, նախագահի հովանավորությամբ և մեր ժողովուրդը ներկայացնող բոլոր ուժերի միասնական ճիգով և փոխադարձ սիրո ու հասկացողության ոգով: