Տաքսիստները բողոքի ակցիա են անցկացրել կառավարության շենքի առջև
Այսօր՝ մարտի 29-ին, մի քանի տասնյակ տաքսու վարորդներ բողոքի ցույց էին անցկացնում կառավարության շենքի մոտ։ Նրանք մեքենաները կանգնեցրել են Հանրապետության հրապարակում, ի նշան բողոքի, որից էլ խցանումներ են առաջացել:
Տաքսիստները պահանջում էին իրենց պարտքերի զրոյացում: Նախաձեռնող խմբի անդամներից Տիգրան Հարությունյանը ասաց. «Այնպես են անում, որ էս աղքատ ժողովուրդն ավելի աղքատանա, և որ կարողանան, ներմուծելով իրենց մեքենաները, բոլորին ծառա սարքեն։ ԱՊՊԱ թանկ, լիցենզավորման գումարները կուտակվել են, տեսախցիկների հնգապատիկ փողերը կուտակվել են, օնլայն տաքսիները, քաղաքապետարանը զարթնել է, սաղ փող են ուզում, սաղ թալանում են էս ոլորտը: Մենք պահանջում ենք հանդիպում վարչապետի հետ»:
Վարորդներին ընդունեց ՀՀ կառավարության նամակների ընդունման բաժնի պետ Ալեքսանդր Ղազարյանը, սակայն պահանջեց, որ հանդիպումը լինի առանց լրագրողների ներկայության:
Հանդիպումից հետո Տիգրան Հարությունյանը ասաց, որ պայմանավորվել են իրենց պահանջները գրավոր ներկայացնել և սպասել պատասխանին: