Հովիկ Աբրահամյանը նախագահի թեկնածուների թվում չկա, հնարավոր է՝ քննարկվի նաև Արմեն Սարգսյանի թեկնածությունը. Վահրամ Բաղդասարյան
Մոտ օրերս մենք արդեն անունների շուրջ քննարկումներ կկազմակերպենք, և այդ մասին բոլորը կիմանան: Այսօր ԱԺ-ում լրագրողների հետ զրույցում նման հայտարարություն արեց ԱԺ «Հայաստանի Հանրապետական կուսակցություն» խմբակցության ղեկավար Վահրամ Բաղդասարյանը՝ անդրադառնալով նախագահի հնարավոր թեկնածուի մասին հարցին:
Անդրադառնալով հարցին, որ այսօր արդեն իսկ նախագահի պաշտոնի համար տարբեր անուններ են շրջանառվում, ավելին՝ տեղեկություններ կան, որ հնարավոր թեկնածուն արդեն վերադարձել է Հայաստան, Բաղդասարյանն ասաց. «Եթե կոնկրետ նշում եք Արմեն Սարգսյան անունը, հնարավոր է՝ նաև այդ թեկնածությունը քննարկվի: Ինձ թվում է՝ չափորոշիչների մեջ կարելի է տեղավորել, բայց մենք դեռ անձերի չենք անդրադարձել, մոտ օրերս քննարկումներ կկազմակերպենք անունների շուրջ, և դրա մասին դուք կիմանաք: Այնպես չէ, որ պետք է լինի մեկ թեկնածու, և մենք մի թեկնածուի շուրջ այդ քննարկումը ծավալենք: Հնարավոր է` մի քանի թեկնածուներից ընտրենք մեկ թեկնածուի և ներկայացնենք, քննարկումների արդյունքում կտեսնենք»:
Սակայն, ՀՀԿ խմբակցության ղեկավարը շեշտեց, որ ՀՀ ապագա նախագահի հարցում ՀՀԿ-ն այնպիսի ընտրություն պետք է կատարի, այնպիսի անձ պետք է ընտրի, որն ընդունելի կլինի նաև բոլոր քաղաքական ուժերի համար:
«Մենք լուրջ խնդիր ենք լուծում՝ երկրի ճակատագրի, երկրի ղեկավար կազմի առաջին դեմքերի մասին է խոսքը գնում, պետք է կարողանանք այնպիսի թեկնածուի ներկայացնել, որ քաղաքական ուժերի կողմից նույնպես ընկալելի լինի: Քննարկումների և հանդիպումների արդյունքում, երբ թեկնածուն կհանդիպի նաև քաղաքական ուժերի հետ, ինձ թվում է՝ նաև քաղաքական կոնսենսուս կլինի»,- շարունակեց Վահրամ Բաղդասարյանը:
Հարցին՝ փոփոխությունների արդյունքում հնարավո՞ր է, որ իշխող ուժից նեղացած և քաղաքականությունից դուրս մնացած անձինք կրկին վերադառնան, Վահրամ Բաղդասարյանը պատասխանեց, թե ինքը չգիտի՝ ովքեր են նեղացածները:
«Կարող է քաղաքական դաշտում ունենան պասիվություն, նման տիպի մարդիկ մենք ունեցել ենք: Ոչ մեկ հավերժ չէ իր պաշտոնում՝ ո՛չ պատգամավորը, ո՛չ խմբակցության ղեկավարը, ո՛չ այլ գործիչներ, և այդ պաշտոնից ազատվելը չի նշանակում կուսակցությունից հեռանալ: Նրանք այլ գործառույթներ են կատարում կուսակցության մեջ: Քաղաքականության մեջ պետք չէ տուրք տալ նեղացածությանը, ես դա չեմ ընդունում: Ի՞նչ է, եթե նեղանում են, գաղափարախոսությունը փոխվո՞ւմ է նրանց մոտեցումներով»,- ընդգծեց Վահրամ Բաղդասարյանը:
Պատգամավորը, պատասխանելով հարցին, որ հիմա, օրինակ, ի՞նչ գործառույթ են իրականացնում Գագիկ Բեգլարյանը, Աշոտ Աղաբաբյանը, Մհեր Սեդրակյանը կուսակցությունում, նշեց. «Գագիկ Բեգլարյանը գործադիր մարմնի անդամ է, և գործադիր մարմնում նա բավական ակտիվ աշխատանք է տանում, Մհեր Սեդրակյանը եղել է պատգամավոր, այժմ պատգամավոր չէ, նա կուսակցության անդամ է, մեր ընկերն է, կուսակցական գործընկերն է, նույնը՝ Աշոտ Աղաբաբյանը: Նրանք որևէ պաշտոնի կամ այլ բաների հավակնություններ չեն ունեցել, նրանք մեր կուսակցության անդամներ են, իսկ Աշոտ Աղաբաբյանը գալիս է կուսակցության ակունքներից»:
Հարցին՝ կա՞ Հովիկ Աբրահամյանի՝ «մայր գետին» միանալու հավանականություն, Բաղդասարյանն ընդգծեց. «Ես խնդրում եմ` չփորձեք ինձ տանել այն դաշտը, որ անձերի շուրջ քննարկումներ ծավալեմ: Հովիկ Աբրահամյանը մեր ընկերն է, մնում է մեր ընկերը, և այդ գետերի միացման հետ կապված, ես չգիտեմ, թե դուք ի՞նչ ակնարկներ եք կատարում: Հովիկ Աբրահամյանն այսօր զբաղվում է իր գործունեությամբ, պարզապես նա ժամանակավորապես պասիվ է քաղաքականության մեջ, և դա նորմալ երևույթ է»:
Սակայն Բաղդասարյանը շեշտեց, որ Հովիկ Աբրահամյանը նախագահի թեկնածուների թվում չկա:
Մանրամասները՝ Tert.am-ում: