Մեկնարկում է ձմեռային զորակոչը

Այսօր Հայաստանի Զինված ուժերում մեկնարկում է 2018թ.-ի առաջին` ձմեռային զորակոչը:

Այս զորակոչն առանձնահատուկ է Պաշտպանության նախարարության կողմից նոր` «Ես եմ» ծրագրի ներդրմամբ: Դրանով նորակոչիկին ծառայության նոր մոդել է առաջարկվում` ժամկետային-պայմանագրային:

«Ես եմ» ծրագրով զորակոչիկի ծառայությունը կտևի 3 տարի, սակայն դրանցից գումարային 7 ամիս զինծառայողը կանցկացնի ազատ արձակման մեջ` սկսած 6-րդ ամսվանից, երբ իր ստորաբաժանումը կստանձնի մարտական հերթապահությունը:

Յուրաքանչյուր ամիս նա կծառայի 1+1+2 բանաձևով. մեկ շաբաթ` արձակուրդում, մեկ շաբաթ` զորամասում, պատրաստվելով մարտական հերթապահության, և երկու շաբաթ` առաջնագծում, մարտական հերթապահություն անցկացնելիս:

Այսպիսով, զորակոչվելուց հետո 5 ամիս ուսումնական փուլ անցնելով` նա կանցնի ծառայության, որի ընթացքում 31 ամսից 7-ը կանցկացնի տանը, իսկ 24-ը` զորամասում և մարտական դիրքերում:

Յուրաքանչյուր անգամ արձակուրդ գնալիս նրան կվճարվի որոշակի գումար` արձակուրդային ծախսերը հոգալու համար: Ծառայության ավարտին նրա անձնական հաշվին կփոխանցվի շուրջ 5 մլն ՀՀ դրամ, որը զորացրված զինծառայողը կկարողանա օգտագործել նպատակային երեք ծրագրերից մեկում`

1. մատչելի բնակարան (սուբսիդավորված հիփոթեքային ծրագիր),
2. մինի-ֆերմա (գյուղաբնակ զինծառայողների համար փոքր ջերմոց կամ ֆերմա ստեղծելու կամ փոքր գյուղտեխնիկա ձեռք բերելու ծրագիր),
3. ուսման վարձի փոխհատուցում:

Նախնական տվյալներով` մի քանի տասնյակ զորակոչիկներ ցանկություն են հայտնել ու դիմել «Ես եմ» ծրագրում ընդգրկվելու համար:

Լուսանկարները՝ Panorama.am-ի: