Վազգեն Մանուկյանը Բելգիայի դեսպանի հետ քննարկել է ԼՂ խնդիրն ու հայ-թուրքական հարաբերությունները
ՀՀ Հանրային խորհրդի նախագահ Վազգեն Մանուկյանն այսօր՝ նոյեմբերի 30-ին, ընդունել է Հայաստանի Հանրապետությունում Բելգիայի Թագավորության արտակարգ եւ լիազոր դեսպան Ժան-Արթուր Ռեժիբոյին (նստավայրը՝ Մոսկվա) եւ դեսպանատան առաջին քարտուղար Վան Կերեբրոեքին:
Հանդիպմանը մասնակցել է նաեւ ՀՀ Հանրային խորհրդի անդամ, Բելգիայի թագավորության պատվավոր հյուպատոս Գրիգոր Բադիրյանը:
Հանրային խորհրդից հայտնում են, որ կողմերն անդրադարձել են Հայաստան-ԵՄ հարաբերություններին, մասնավորապես օրերս Հայաստանի ու Եվրամիության միջեւ ստորագրված Համապարփակ եւ ընդլայնված գործընկերության համաձայնագրին՝ հույս հայտնելով, որ նոր համաձայնագիրը է´լ ավելի կսերտացնի Եվրամիության հետ Հայաստանի գործընկերային հարաբերությունները: Քննարկվել է նաեւ ԵՏՄ-ում Հայաստանի մասնակցությունն ու դերը:
Անդրադառնալով «բրեքսիթին»ն եւ Ուկրաինայի օրինակներին՝ ՀԽ նախագահն ընդգծել է, որ «կամ´, կա´մ» քաղաքականությունը ցանկալի է փոխարինել «եւ´, եւ´»-ով, ինչն առավել արդյունավետ ճանապարհ է, եւ Հայաստանը գնացել է հենց այդ ճանապարհով:
Քննարկվել է նաեւ ՀՀ Հանրային խորհրդի գործունեությունն ու աշխարհում համանման կառույցների դերը: Բելգիայի դեսպանը, որը ժամանակին գործունեություն է ծավալել Բելգիայի համապատասխան կառույցներում, ընդգծել է այդ կառույցների կարեւորությունը երկրի զարգացման գործում:
Կողմերն անդրադարձել են նաեւ Ղարաբաղյան հակամարտության խնդրին: Վազգեն Մանուկյանն ընդգծել է, որ խնդրի կարգավորման գործում էական նշանակություն ունի Արցախի կարգավիճակի հարցը, եւ եթե Ադրբեջանը քաղաքական կամք ունենա ընդունելու Արցախի անկախ լինելու իրավունքը, ապա մյուս հարցերը, որոնք վերաբերում են տարածքներին, փախստականներին եւ այլն, հնարավոր կլինի արագորեն լուծել բանակցությունների միջոցով:
Անդրադարձ է եղել նաեւ Հայաստան-Թուրքիա հարաբերություններին: