«Փաստեր չկան, կա հիստերիա և վիրավորանք». Զախարովա

Մենք տեսնում ենք ապակառուցողական և իրականությունից հեռու հայտարարություններ: Այս մասին ճեպազրույցի ժամանակ հայտարարել է ՌԴ ԱԳՆ ներկայացուցիչ Մարիա Զախարովան՝ պատասխանելով ռուս խաղաղապահների գործունեության վերաբերյալ հայկական կողմի հայտարարությունների մասին լրագրողի հարցին: «Տարօրինակ է, որ այդ հայտարարությունները շարունակվում են: Մենք բազմիցս հնչեցրել ենք մեր դիրքորոշումը: Այդ հայտարարությունները չեն նպաստում տարածաշրջանի հարցերի լուծմանը:

Միգուցե, Հայաստանում ինչ-որ մեկին դա ձեռնտու է: Կարծում եմ, դա փորձ է՝ պատասխանատվությունից խուսափելու համար: Եթե կան ապացույցներ, խնդրեմ, կարող եք ներկայացնել: Փաստեր չկան, կա միայն հիստերիա և վիրավորանք: Որևէ մեկն իրավունք չունի վիրավորել մեր խաղաղապահներին, իսկ եթե վիրավորում են, ապա պատասխան կստանան: Ինչ վերաբերում է էթնիկ զտումներին, ապա այս դեպքում ևս Երևանը պետք է ինչ-որ ապացույց, ինչ-որ փաստաթուղթ ներկայացնի»,- ասել է Զախարովան:

Հիշեցնենք, որ 2023թ. դեկտեմբերի 19-ին Հայաստանի Հանրային հեռուստաընկերությանը տված հարցազրույցում ՀՀ վարչապետ Նիկոլ Փաշինյանն ասել էր. «Ռուսաստանի Դաշնության խաղաղապահ զորախումբը Լեռնային Ղարաբաղ գործուղվել է Ռուսաստանի Դաշնության Դաշնային ժողովի կայացրած որոշման հիման վրա: Եվ Դաշնային ժողովի այդ որոշման մեջ գրված է, որ Ռուսաստանի Դաշնության խաղաղապահ զորախումբն այնտեղ է քաղաքացիական բնակչությանը պաշտպանելու համար: Ո՞ւր է հիմա Լեռնային Ղարաբաղի քաղաքացիական բնակչությունը»: