Մահացու լուր՝ Հայաստանի համար. Հաջիևն ասում է, որ Ալիևի և Փաշինյանի ոչ պաշտոնական զրույցն արդյունավետ էր
Ահավոր է պատկերացնել, թե ինչ ավերում ու կոտորածներ են սպասվում կամովին ամանորյա «նարկոզի» տակ մտնող Հայաստանի հայ բնակչությանը, եթե ոխերիմ թշնամին հայտարարում է, թե՝ Փաշինյանի ու Ալիևի զրույցն արդյունավետ ու կառուցողական է եղել:
Ինչպես հաղորդում է tert.am-ը, Ադրբեջանի նախագահի խորհրդական Հիքմեթ Հաջիևը հայտարարել է, որ Սանկտ Պետերբուրգում ԱՊՀ երկրների ղեկավարների հանդիպման շրջանակում Ադրբեջանի նախագահ Իլհամ Ալիևի և Նիկոլ Փաշինյանի ոչ պաշտոնական զրույցն ադրբեջանական կողմը գնահատում է որպես արդյունավետ և կառուցողական փոխգործակցություն, որը նպաստում է երկու երկրների միջև խաղաղության օրակարգի առաջմղմանը։
Հաջիևը բարձր է գնահատել Փաշինյանի աշխատակազմի և Ադրբեջանի նախագահի վարչակազմի՝ դեկտեմբերի 7-ի համատեղ հայտարարությունը, որի համաձայն՝ Ադրբեջանն ազատ է արձակել 32 հայ զինծառայողների, իսկ Հայաստանը՝ 2 ադրբեջանցի զինծառայողների: Նա պատմական է որակել հայտարարությունը, հավելել՝ այն ցույց տվեց, որ եթե կողմերը միասին աշխատեն, վստահեն իրար, առաջընթացն ապահովված է:
Պաշտոնյան նաև ողջունել է երրորդ երկրների ցանկությունը՝ նպաստելու կարգավորման գործընթացին, սակայն, նրա խոսքով, խաղաղության հաստատման համար պատասխանատու են Հայաստանը և Ադրբեջանը:
***
Ադրբեջանը Հայաստանի հետ խաղաղության պայմանագիր կնքելու ճանապարհին լուրջ խոչընդոտներ չի տեսնում՝ հայտարարել է Ադրբեջանի նախագահի խորհրդական Հիքմեթ Հաջիևը:
«Հստակ ժամկետների մասին դժվար է խոսել, քանի որ Բաքուն և Երևանը դեռ պետք է շարունակեն բանակցությունները՝ ավարտին հասցնելու գործընթացը»,-մանրամասնել է պաշտոնյան:
Ադրբեջանի նախագահի օգնականը վստահեցրել է՝ Բաքուն հավատարիմ է տարածաշրջանում կայունության հաստատման և Հայաստան-Ադրբեջան հարաբերությունների կարգավորման ջանքերին:
«Խաղաղության պայմանագիրը կարևոր փաստաթուղթ է, այն կփոխի տարածաշրջանի մթնոլորտը, Հայաստանի և Ադրբեջանի միջև շփումների էությունը:
Սակայն պետք է հասկանալ, որ այդ փաստաթուղթը կախարդական փայտիկ չէ, այն միանգամից բոլոր հարցերը չի լուծի»,-ընդգծել է Հաջիևը, հավելել՝ պայմանագիրը թույլ կտա բացառել երկու երկրների միջև հետագա ռազմական առճակատման, պատերազմների և վայրագությունների տարրը։
Հավելենք, որ Հաջիևը առանց մեկնաբանության է թողել Նիկոլ Փաշինյանի՝ ռուսական շուկաներում թուրքական լոլիկ վաճառող ադրբեջանցու կեպիով սանկտպետարբուրգյան հանդիպումներին մասնակցելու փաստը: