Մեկնարկում է «Զեյթուն 3» բնակարանաշինական ծրագիրը
«Երեւանի պետական համալսարանի շրջանավարտների միավորում» հասարակական կազմակերպությունը, Հայաստանի Հանրապետության Նախագահ, Երեւանի պետական համալսարանի շրջանավարտների միավորման հոգաբարձուների խորհրդի նախագահ Սերժ Սարգսյանի բարձր հովանու ներքո մեկնարկում է «Մատչելի բնակարան երիտասարդ մասնագետներին» բնակարանային ապահովության սոցիալական ծրագրի հերթական փուլը:
Ծրագրի շրջանակում նախատեսվում է Երեւան քաղաքի Քանաքեռ-Զեյթուն վարչական շրջանում Ահարոնյան փողոցին հարող տարածքում (Զեյթուն 1 եւ Զեյթուն 2 համալիրների հարեւանությամբ) կառուցել ժամանակակից ճարտարապետական լուծումներով բազմաբնակարան-բազմաֆունկցիոնալ շենքային համալիրներ, որոնց բնակարանները շուկայականից անհամեմատ ցածր գներով տրամադրվելու են Հայաստանի Հանրապետության երիտասարդ մասնագետներին:
Ծրագրի հնարավոր շահառուներ կարող են դառնալ մինչեւ 45 տարեկան, առնվազն երկու տարվա մասնագիտական աշխատանքային փորձ ունեցող, բնակարանի կարիքավոր (Երեւան քաղաքում բնակարան չունեցող կամ բնակարանային պայմանների բարելավման հրատապ անհրաժեշտություն ունեցող) ՀՀ բարձրագույն ուսումնական հաստատությունների, ՀՀ գիտությունների ազգային ակադեմիայի երիտասարդ գիտաշխատողները եւ դասախոսները, երիտասարդ բուժաշխատողները, լրագրողները, մանկավարժները (նախադպրոցական, հանրակրթական, միջին մասնագիտական հաստատությունների), ստեղծագործական միությունների անդամները, ՏՏ ծրագրավորողները, բանկային համակարգի աշխատողները, պետական եւ համայնքային ծառայողները:
Բնակելի համալիրն ունենալու է մեկ (45 քմ.), երկու (60-70 քմ.), երեք (90-100 քմ.) չորս (125 քմ.) եւ հինգ (160 քմ.) սենյականոց մոտ 500 բնակարաններ: Բնակարանների վերջնական հատակագծերը կհրապարակվեն մինչեւ դեկտեմբերի 10-ը:
Բնակելի համալիրի շինարարությունը մեկնարկելու է 2017թ. դեկտեմբերին եւ նախատեսվում է ավարտել 2020թ. մայիսին: Բազմաբնակարան-բազմաֆունկցիոնալ շենքը լինելու է մոնոլիտ-երկաթբետոնյա: Այն ունենալու է 14 բնակելի հարկ, ինչպես նաեւ ստորգետնյա ավտոկայանատեղեր եւ հասարակական սպասարկման տարածքներ: Բնակելի համալիրն ունենալու է ժամանակակից արտաքին լուսավորություն, իսկ շենքի հարակից տարածքն ամբողջությամբ բարեկարգվելու է, նորացվելու են կոմունիկացիոն համակարգերը, կառուցվելու են մանկական խաղահրապարակներ եւ կանաչապատ հանգստի գոտիներ: Բնակարանի մեկ քմ-ի արժեքը կազմելու է 270000-290000 ՀՀ դրամ:
Բնակարանները շահառուներին հանձնվելու են ներքին հարդարման երկու տարբերակով: Մասնակի վերանորոգված՝ 1քմ.-ի արժեքը՝ 270000 ՀՀ դրամ:
Ձեռքբերվող բնակարանի արժեքի վճարման համար առաջարկվում են հետեւյալ տարբերակները.
Բնակարանի արժեքի վճարումը հիփոթեքային վարկավորման միջոցով.
Բնակարանի արժեքի վճարումը հիփոթեքային վարկավորման միջոցով նախընտրելու դեպքում սահմանվում է հետեւյալ նախնական պայմանները` 20% կանխավճար, մինչեւ 20 տարի մարման ժամկետ, տարեկան մինչեւ 8.5% տոկոսադրույք, անուիտետային մարման գրաֆիկ, ձեռքբերվող եւ/կամ այլ անշարժ գույքի գրավադրում:
Շահառուները կօգտվեն եկամտային հարկի միջոցով վարկի սպասարկման համար վճարվող տոկոսները վերադարձնելու՝ օրենքով սահմանված արտոնությունից: