ԵՊՀ դասախոսներն իրավունք չունեն հրապարակավ կարծիք հայտնել տարկետման խնդրի շուրջ
Երեւանի պետական համալսարանի (ԵՊՀ) դասախոս Յուլյա Անտոնյանը ֆեյսբուքյան իր էջում այսօր գրել է դասախոսների նկատմամբ ճնշումների փորձի մասին:
«Այսօր ԵՊՀ-ի պրոռեկտորը հրաման արձակեց, որով արգելում է ԵՊՀ-ի դասախոսներին հրապարակավ արտահայտվել բանակին եւ տարեկետման վերաբերող հարցերի շուրջ: Անկախ նրանից, թե որն է իմ անձնական կարծիքը այդ հարցերում, ես համարում եմ, որ դա մեր ու, մասնավորապես, իմ մարդկային ու սահմանադրական իրավունքների խախտումն է: Ո՛չ պրոռեկտորը, ո՛չ ռեկտորը, ո՛չ էլ հանրապետության նախագահը որեւէ իրավունք չունեն նման հրամաններ տալու: Հավելեմ նաեւ, որ ակտիվ ուսանողներին սպառնացել են ձերբակալմամբ: Այսպիսով իր լուման մտցնելով ստալինյան բռնաճնշումների 80-ամյակը «տոնելու» գործում»,- գրել է դասախոսը ապա երկու հետգրություն ավելացրել.
«P.S. Ինձ խնդրեցին ուղղել, որ դա պրոռեկտորի հրաման չէր, այլ ներքին կարգադրություն, կամ անգամ խնդրանք: Ինչը իրականում շատ բան չի փոխում ու ցույց է տալիս, թե որքանով է համալսարանը իրականում ճնշված քաղաքական իշխանությունների կողմից:
P.P.S. Ինչպես հասկացա, համալսարանում արդեն անհանգստացած են այդ պոստով: Ես նրանց հասկանում եմ, բայց նաեւ խնդրում եմ հասկանալ ինձ: Եթե այսօր «ներքին խնդրանքներին», փակ դռներին չարձագանքենք, վաղը կսկսվեն աշխատանքից ազատումներ, ձերբակալումներ եւ այլն: Ես անհանգստացած եմ իմ եւ իմ կոլեգաների վաղվա օրվա մասին, մեր դասախոսական, գիտական եւ քաղաքացիական ճակատագրի մասին»:
Արդեն երկու օր է՝ Երեւանյան բուհերում տեղի ունենում բավական զանգվածային դասադուլներ: Բուհերում փորձ է արվում դռները փակ պահել՝ դասադուլ անող երիտասարդներին միանալ ցանկացողների ելքը շենքերից հնարավորինս խոչընդոտելու նպատալկով: Դասադուլի մասնակիցները պահանջում են պահպանել ակադեմիական տարկետման գործող սկզբունքները եւ դեմ են Պաշտպանության նախարարության օրենսրական նախաձեռնությանը, համաձայն որի ուսանողներն, ըստ էության, նախ պետք է բանակում իրենց պարտքը կատարեն, հետո մտածեն կրթության ու գիտությամբ զբաղվելու մասին: