«Հայ օգնության միության»անդամները հերթական անգամ այցելեցին Արցախի սահմանային զորամաս
«Հայ օգնության միություն» բարեգործական հասարակական կազմակերպությունը հերթական անգամ այցելեց Արցախի սահմանային զորամաս։ Ծրագիրը հագեցած էր մի շարք միջոցառումներով՝ կրթական և մշակութային։
Զորամասում կայացավ լուսանկարիչ Հակոբ Պողոսյանի «25 տարի անց» խորագրով ցուցահանդեսը։ Լուսանկարներում պատկերված էին 1992-93թթ. Արցախյան պատերազմի և տվյալ զորամասի նորօրյա զինվորները՝ ծանոթ ու անծանոթ հերոսների լուսանկարներ, որոնք անցնող 25 տարիների ընթացքում խոնարհաբար ու համեստորեն ծառայել են հայրենիքին: ՀՀ կրության և գիտության նախարարության ներկայացուցիչ, ՀՕՄ-ուհի Օֆելյա Գրիգորյանը զինծառայողներին ներկայացրեց կրթական այն հնարավորությունները, պայմանները, որոնցից նրանք կարող են օգտվել ժամկետային զինծառայությունն ավարտելուց հետո։
Նշենք, որ ՀՕՄ-ը նշված ծրագիրն իրականացրել է ՀՀ Նախագահի աշխատակազմի կողմից ՀԿ-ներին հատկացվող դրամաշնորհի և Հայաստանի երիտասարդական հիմնադրամի հայտարարած մրցույթի շրջանակներում։
ՀՕՄ-ի Հայաստանի շրջանային վարչության ատենապետուհի Դիանա Հովսեփյանը նշեց, որ ՀՕՄ-ը հերթական անգամ հյուրընկալվել է սահմանային զորամասում, որտեղ տերն ու տիրականը, սահման պահողն ու կռիվ տվողը զինվորներն են: «Դուք եք, որ կերտում եք պետականությունը և նրա լիիրավ ու իրավատեր քաղաքացի լինելու պատիվը: Մեկ տարի առաջ բոլորս միասին ականատես եղանք հերթական ոտնձգության, և բոլորս միասին՝ բանակ-թիկունք միասնականությամբ հաղթահարեցինք հերթական փորձությունը: Ունեցանք անդառնալի կորուստներ, հասկացանք, որ զգոնությունը երբեք չպետք է թուլացնենք, միմյանց նկատմամբ պետք է ներողամիտ գտնվենք, պետք է սիրենք ու պաշտպանենք մեր մերձավորին, ընկերոջը, ծառայակցին, սպային ու վերջապես մեր երկիրն ու նրա տարածքային ամբողջականությունը: Այս դասերը քաղել ենք բոլորս, քաղել ենք լուռ, թաց աչքերով, կորստի ու վշտի ցավով: Եվ մի բան պարզ է. պետք է առաջ գնանք, զարգանանք, միավորվենք ու հզորանանք: Պետք է հասկանանք, որ ամեն մեկս մեր տեղում ու դերում անելիք ունի, լինի սահմանին թե թիկունքում, Հայաստանի խորքում թե սփյուռքի որևիցե հեռավոր համայնքում, լինի կին թե տղամարդ, ահել թե ջահել, հարուստ թե աղքատ, իշխանավոր թե ընդդիմադիր, արվեստագետ թե գործարար»,- ասաց Դիանա Հովսեփյանը:
ՀՕՄ ներկայացուցիչները զինվորներին հանձնեցին սփյուռքի ու հայաստանի տարբեր մարզերում գործող 36 դպրոցների աշակերտների՝ զինվորներին ուղղված նամակները։
Մանրամասները` Shamshyan.com -ում