Քրդստանի տարածաշրջանի նախագահ Մասուդ Բարզանիի իրական «ընդդիմախոսն» շիա հայտնի այաթոլլահ Ալի Սիստանին է
Չնայած այս մասին շատ չի գրվում, սակայն Քրդստանի տարածաշրջանի նախագահ Մասուդ Բարզանիի իրական «ընդդիմախոսն» համաիրաքյան քաղաքական դաշտում թվացյալ ստվերում գտնվող շիա հայտնի այաթոլլահ Ալի Սիստանին է, որը նույնիսկ Արևմուտքում դիտարկվում է որպես հետսադդամյան Իրաքի ամենաազդեցիկ գործիչ:
Ուշագրավ է, որ հենց նրա կրոնական հրովարտակի (ֆեթվա) համաձայն է ստեղծվել նաև այսօրվա Իրաքի ամենաարդյունավետ և թերևս ամենամարտունակ ռազմական միավորումը՝ «ժողովրդական աշխարհազորը» («Հաշդ ալ-Շաաբի»):
Այս հռչակավոր այաթոլլահը սերում է Իրանի արևելքում գտնվող Սիստանի տարածաշրջանից, որն ավելի ուշ պարսկականացված սակերի (սկյութների) պատմական բնակության տարածքներից մեկն էր՝ մինչիսլամական միջնադարում հայտնի հենց Սակաստան անունով:
Բազմիցս եմ գրել, որ պատմությունը հետաքրքիր անակնկալներ ունի, քանզի տվյալ դեպքում արաբական երկիր համարվող Իրաքում հենց այս պահին իրականում, պատկերավոր ասած, «մրցակցում են» երկու իրանական ժողովուրդներից՝ քրդերից և պարսկականացված սակերից սերող խարիզմատիկ առաջնորդները:
Վարդան Ոսկանյանի ֆեյսբուքյան էջից