Ի՞նչ մեսիջ է նշանակում Ղարաբաղի արտգործնախարարի փոփոխությունը
Արցախի հանրապետության նախագահ Բակո Սահակյանը այսօր ձևավորել է նոր կառավարություն, նոր կառուցվածքով, որը բխում է նոր ընդունված սահմանադրությունից: Այդ սահմանադրությամբ Արցախը կիսանախագահական կառավարման մոդելից անցնում է նախագահական կառավարման մոդելի:
Ինչպես հայտնի է, լիարժեքորեն նոր սահմանադրությունը կսկսի աշխատել 2020 թվականից: Եվ մինչև 2020 թվականը Բակո Սահակյանը մնալու է նախագահի պաշտոնում:
Սահմանադրությունից բխող կառավարության կառուցվածքային փոփոխությունը չէր ենթադրում զուտ կադրային փոփոխություն, բայցև չէր էլ բացառում: Պարզ է, որ հանգուցային նախարարները և ներկայիս վարչապետը պահպանելու էին իրենց պաշտոնները: Սակայն պարզվեց, որ այդ շարքում մի բացառություն եղավ, խոսքը Կարեն Միրզոյանի մասին է, ով դուրս մնաց այս ցանկից, և Արցախի արտգործնախարարի պաշտոնում նշանակվեց Մասիս Մայիլյանը: Անշուշտ, այստեղ անձի խնդիրը չէ, երկուսն էլ կիրթ պրոֆեսիոնալ անձնավորություններ են, խնդիրը կայանում է նրանում, որ ղարաբաղյան բանակցային գործընթացը մտնում է բավականին դժվար փուլ, որտեղ Հայաստանի և Ղարաբաղի դիրքորոշումները որոշ դետալների շուրջ տարբերվում են: Վկան` Հայաստան - Սփյուռք համաժողովի ժամանակ Էդվարդ Նալբանդյանի և Կարեն Միրզոյանի հնչեցված գնահատականներն էին:
Ի՞նչ մեսիջ է նշանակում այս փոփոխությունը, պարզ կդառնա մոտ ժամանակաշրջանում:
Հակոբ Կարապետյան