Օսմանյան կայսրության առաջին կին բժիշկը եղել է հայուհի
Օսմանյան կայսրության առաջին կին բժիշկը, պարզվում է, եղել է հայուհի Զարուհի Քավալջյանը՝ ծննդով Թուրքիայի Ադափազար քաղաքից:
Ինչպես հայտնում է թուրքական haberlisin.com կայքը, նրա հայրը՝ հեղինակավոր բժիշկ Սերոբ Քավալջյանը, 1875թ.-ին ավարտել է ԱՄՆ Բոսթոնի համալսարանի բժշկության ֆակուլտետը, աշխատել Թուրքիայի Իզմիթ և Ադափազար քաղաքներում. վերջինում էլ 1877թ.-ին ծնվել է Զարուհին:
Չիկագոյում բժշկական կրթություն ստանալուց հետո հայուհին վերադարձել է հայրենիք և հոր հետ աշխատել Ադափազարում, միևնույն ժամանակ կենսաբանություն դասավանդել տեղի Ամերիկյան քոլեջում:
Առաջին համաշխարհայինի տարիներին Քավալջյանը ակտիվորեն մասնակցել է վիրավորներին և տուժածների բժշկական օգնություն ցույց տվող մի շարք հաստատությունների կամավորական աշխատանքներին, ավելի ուշ տեղափոխվել է Կ.Պոլիս:
Ստամբուլի հայաշատ Սկյուտառ շրջանում բժշկուհին դասավանդման է անցել տեղի Ամերիկյան դպրոցում և հայտնի դարձել Դոկտոր Քավալ անվամբ:
1969թ.-ին մահացած Քավալջյանի մարմինն ամփոփված է Ստամբուլի Ֆերիքյոյ շրջանի հայկական գերեզմանատանը: