Գևորգ Կոստանյանը վերահաստատում է «Սասնա ծռեր»-ի վերաբերյալ իր հայտարարությունը
Նախկին գլխավոր դատախազ, այժմ Մարդու իրավունքների Եվրոպական դատարանում Հայաստանի ներկայացուցիչ Գևորգ Կոստանյանը վերահաստատում է դեռևս մեկ տարի առաջ «Սասնա ծռեր»-ի վերաբերյալ իր հայտարարությունը, որն, ի դեպ, ըստ մամուլի, դարձավ նրա հրաժարականի պատճառը: Հաղորդում է «Ազատություն»-ը:
Անցած տարի, երբ «Սասնա ծռեր»-ի անդամները գրավեցին Պարեկապահակային ծառայության գնդի (ՊՊԾ) տարածքը, այն ժամանակ Գևորգ Կոստանյանը «Շանթ» հեռուստաընկերության եթերում հայտարարեց, որ խմբի անդամները կարող են խուսափել քրեական պատասխանատվությունից, եթե վայր դնեն զենքը և հանձնվեն:
Նկատենք՝ այդօրինակ բովանդակությամբ հայտարարություն նաև Ազգային անվտանգության ծառայությունն (ԱԱԾ) էր տարածել:
Հարցին, թե ինչո՞ւ Քրեական օրենսգրքի խրախուսական հոդվածները չտարածվեցին իրավապահներին հանձնված «Սանա ծռեր»-ի անդամների վրա, Գևորգ Կոստանյանը շեշտեց, թե այդ հարցին պատասխանելու համար պետք է հասկանալ՝ արդյո՞ք այլ հանցակազմ նրանց քայլերում չի եղել։
«Ես մեջբերել եմ Քրեական օրենսգրքի այս պահին գործող և այն ժամանակ գործող, և հիմա կարող եք ինքներդ բացել Քրեական օրենսգրքի 218 և 219 հոդվածները, որտեղ հստակ սահմանված է այն ամենը, որը բառացիորեն ես մեջբերել եմ եթերում։ Խոսքը հետևյալի մասին է, որ եթե հանցագործություն կատարած անձինք, եթե նրանց արարքներն այլ հանցակազմ չեն պարունակում, ապա այդ շենքեր-շինություններ ազատելու կամ պատանդներին ազատելու դեպքում քրեական պատասխանատվության չեն ենթարկվում», - «Ազատություն» հետ զրույցում ասաց Կոստանյանը՝ շարունակելով. - «Հիմա տեսեք՝ հիպոթետիկ պատկերանում ենք, որ ինչ-որ խումբ գրավում է ինչ-որ շենք, վերցնում է պատանդներ, ընդունենք, այդ պատանդների նկատմամբ ծանր վնասվածքներ են կիրառվում, խոշտանգումներ են կիրառվում պատանդ գտնվելու ժամանակահատվածում, հետո պատանդին բաց են թողնում...»։
Դիտարկմանը, թե այս դեպքում խոշտանգման դեպքեր չկան, իսկ սպանությունների գործով երկու անձ է մեղադրվում, և հարցին, թե ինչո՞ւ այդ խրախուսական հոդվածը մյուսների վրա չտարածվեց, Կոստանյանը պատասխանեց. - «Ես կարծում եմ, որ այդ հարցը փաստաբանները պետք է բարձրացնեն, թե ինչո՞ւ, եթե իրենք գտնում են, որ այդ անձանց արանքներում այլ հանցակազմի տարրեր չկան, նրանց նկատմամբ քրեական հետապնդումն այդ մասով չի դադարեցվում։ Ես սրա մասին չեմ կարող գնահատական տալ»։
Զինված խումբը, հիշեցնենք, ՊՊԾ գնդի տարածքը գրաված պահեց 15 օր, ինչից հետո զենքերը վայր դրեց և հանձնվեց իշխանությանը։ Այդ ընթացքում երեք ոստիկան զոհվեց։
Աղբյուր՝ «Ազատություն»