Քաղաքացիական նախաձեռնություն՝ հանուն կրթական համակարգի բարեփոխումների
Ապրիլի 15-ին ինքնաբուխ հավաքով ձևավորված «Կրթական քաղաքացիական նախաձեռնության» անդամները, առաջնորդվելով ՀՀ Սահմանադրության 38-րդ հոդվածով ամրագրված կրթության իրավունքի դրույթներով, պետությունից պահանջելով այդ իրավունքի լիարժեք ապահովումն ու իրացումը` բոլոր երեխաների համար՝ անկախ նրանց սեռից, սոցիալական կարգավիճակից, բնակավայրից, հաշմանդամությունից և այլ առանձնահատկություններից, համաձայնության են եկել կրթական համակարգի զարգացմանն ուղղված մի շարք սկզբունքների շուրջ:
Նախաձեռնության ժողովներում անցած մեկ ամսվա ընթացքում տեղի են ունեցել մի շարք քննարկումներ և ձևակերպվել են մոտեցումներ ու քայլեր։
Արդյունքում, ձևավորվել են հետևյալ թեմատիկ և համակարգող խմբերը, որոնց կարող են միանալ բոլոր ցանկացողները։
- Այլընտրանքային մեթոդների խումբ (նպատակը՝ ստեղծել բարենպաստ պայմաններ այլընտրանքային մանկավարժական ուղղությունների համար, ապահովել դպրոցների միջև մանկավարժական գաղափարների և մեթոդների ազատ մրցակցության և փոխանակման հնարավորություն)
- Ծնողների նախաձեռնություն/հանձնախումբ (նպատակը՝ ծնողների ինքնակազմակերպման միջոցով նպաստել դպրոցներում մասնակցային խորհուրդների արդյունավետ և հաշվետու գործունեությանը, հաղթահարել կրթական համակարգում անօրինական պրակտիկաների կիրառումն ու տեղերում խթանել նախաձեռնության մյուս սկզբունքների իրագործումը)
- Մասնագիտական խումբ (նպատակը՝ մասնագիտական մոտեցումների միջոցով հավաքագրել և խմբավորել ժողովների ընթացքում բարձրացված խնդիրները, կրթական ոլորտի հետ առնչվող մասնագետների օգնությամբ մշակել կրթական քաղաքականության համակարգային փոփոխությունների քայլեր՝ պետական լիազոր մարմնի կողմից դրանց կիրառման նպատակով)
- Համակարգող խումբ (նպատակը՝ համակարգել նախաձեռնության բոլոր խմբերի սահուն և արդյունավետ աշխատանքն ու կազմակերպչական հարցերը՝ նախաձեռնության ձևակերպված սկզբունքներին համապատասխան)
Տեղեկատվության սահուն փոխանակման և արդյունավետ աշխատանքի համար նպատակահարմար է համարվել, որպեսզի բոլոր խմբերից շուրջ երկու անդամներ լինեն նաև Համակարգող խմբում։
Նախաձեռնության գլխավոր հարթակը ընդհանուր ժողովն է, իսկ բովանդակային հիմքը «Հիմնական սկզբունքներն ու գործունեության ձևերն» են, որոնք ուրվագծվել են մայիսի 2-ին տեղի ունեցած երկրորդ ընդհանուր ժողովի ընթացքում։ Հղումը՝ այստեղ:
Բացի այդ, բացվել է թեժ գիծ՝ էլեկտրոնային փոստի հասցե, որին կարող եք այսուհետ ուղարկել տեղեկություններ կրթական համակարգում ծագող խնդիրների մասին․ [email protected]
Խմբերը նաև նախաձեռնության էջում կտեղադրեն բոլոր օգտակար իրավական ակտերն ու տեղեկատվությունը ծնողների, աշակերտների և բոլոր շահագրգիռ անձանց համար։
Միացե´ք, ներգրավվե´ք և օգտագործե´ք կրթական համակարգը փոխելու այս հնարավորությունը։
Կրթական քաղաքացիական նախաձեռնություն