«Երկիր ծիրանի» կուսակցության նախագահը կոչ արեց Հայաստանում ժամանակավոր կառավարություն ձեւավորել
2020թ․ մենք կարող էինք լրիվ վերականգնել շփման գիծը եւ Ղարաբաղի պատշաճ պաշտպանություն ապահովել, բայց դա տեղի չունեցավ։ Այս մասին ապրիլի 18-ին լրագրողների հետ հանդիպմանն ասաց «Երկիր ծիրանի» կուսակցության նախագահ Զարուհի Փոստանջյանը։
Ընդդիմադիրը, մասնավորապես, հիշեցրեց, որ նոյեմբերի 9-ի եռակողմ հայտարարության ստորագրման պահին Ղարաբաղի Պաշտպանության բանակը հանրապետության միայն երեք շրջանների նկատմամբ է կորցրել վերահսկողությունը։
«2020թ․ նոյեմբերի 9-ից հետո մենք պետք է հստակ գնահատեինք ստեղծված իրավիճակը եւ անհապաղ իշխանափոխություն ապահովեինք։ Սակայն դա էլ տեղի չունեցավ։ Այնուամենայնիվ, իմացեք, որ երբեք ուշ չէ»,- ընդգծեց Փոստանջյանը։
Նա քաղաքացիներին կոչ արեց միանալ գործող ռեժիմի տապալմանն ուղղված պայքարին։ Սակայն, ըստ ընդդիմադիր կուսակցության ղեկավարի, պետք է փոխվեն ոչ միայն իշխանության մեջ գտնվող անձինք, այլեւ մոտեցումներն ու ծրագրերը պետք է փոխվեն։
«Նոր ծրագիրը հետեւյալն է. «21-րդ դարի Հայաստանը ոչ թե 29,8 հազար քառակուսի կիլոմետր տարածք ունեցող երկիր է, որը դեռ պետք է տարածքների որոշակի փոխանակում իրականացնի Ադրբեջանի հետ, այլ ավելի քան 42 հազար քառակուսի կիլոմետր տարածք ունեցող պետություն, ներառյալ՝ Ղարաբաղը (նկատի ունի ժամանակակից Հայաստանի տարածքը եւ նախկին ԼՂԻՄ-ի տարածքը՝ շուրջը տեղակայված 7 շրջաններով - խմբ.)»,- ասաց Փոստանջյանը՝ կոչ անելով ճանաչել ԼՂՀ անկախությունը։։
Այն ամենը, ինչ տեղի է ունենում, նրա կարծիքով, կարող է պատճառ հանդիսանալ տարածաշրջանում լայնածավալ եւ չափազանց կատաղի պատերազմ սկսելու համար։ «Եվ հետեւաբար, մենք պետք է ունենանք համապատասխան ռազմաքաղաքական ղեկավարություն։ Առաջիկա մի քանի օրում մենք պետք է ձեւավորենք այդ ղեկավարությունը, ինչը միանգամայն հնարավոր է։ Դա հնարավոր է նույնիսկ ներկայիս խորհրդարանի հետ համագործակցությամբ։ Մենք միանգամայն կարող ենք ընդհանուր հայտարարի գալ եւ ստեղծել իմ կողմից հիշատակված ժամանակավոր կառավարությունը»,- պարզաբանեց քաղաքական գործիչը։