Բլինքենը Թուրքիայի ԱԳ նախարարի հետ քննարկել է Թուրքիայի ու Ադրբեջանի միջև ՀՀ-ով ճանապարհի հարցը
![Բլինքենը Թուրքիայի ԱԳ նախարարի հետ քննարկել է Թուրքիայի ու Ադրբեջանի միջև ՀՀ-ով ճանապարհի հարցը](/timthumb.php?src=/disc/26-09-23/874eaff327b77245c286400fda49d3c9.jpg&w=450)
ԱՄՆ պետքարտուղարությունում լրագրողների հետ այսօրվա ճեպազրույցին հարց էր հնչել՝ Թուրքիայի նախագահ Էրդողանի Նախիջևան կատարած այցի, Թուրքիայի ու Ադրբեջանի միջև Հայաստանի տարածքով ցամաքային ճանապարհ ունենալու հեռանկարների ու այս հարցում ԱՄՆ-ի դիրքորոշման մասին:
Ի պատասխան, պետքարտուղարության մամլո խոսնակ Մեթյու Միլերը տեղեկացրեց, որ այս հարցերը քննարկվել են վերջերս ԱՄՆ պետքարտուղարի ու Թուրքիայի արտգործնախարարի միջև Նյու Յորքում, փոխանցում է «Ամերիկայի ձայնը»։
«Ես չեմ պատրաստվում ասել ավելին, քան, որ մենք այս հարցով զբաղվել ենք Թուրքիայի կառավարության հետ: Դա այն հարցերից մեկն էր, որը պետքարտուղար Բլինքենը քննարկել է իր թուրք գործընկերոջ հետ, երբ նրանք հանդիպել են ուրբաթ օրը Նյու Յորքում։ Մենք շարունակում ենք հուսալ, որ մեր բոլոր դաշնակիցներն ու գործընկերները կարող են կառուցողական դեր խաղալ տեւական համաձայնության հասնելու գործում, և դա, իհարկե, կներառի Թուրքիան»,- ասել է Միլերը:
Պետքարտուղարության խոսնակը հրաժարվեց տրամադրել այլ մանրամասներ այս հարցի վերաբերյալ: